Perfil Malahara

Mala-hara Aldeia ida nebe pertense ba Suco Muapitine, Sub-distrito Lospalos, Distrito Lautem. Aldeia ida ne'e existe iha tinan 1986 ho naran "Desa Binaan Mala-hara", no inagura husi Eng.Mario Viegas Carrascalao nudar Governador Provinsia Tim-Tim iha tempo neba.

Distansia husi Lospalos Vila ba Malahara 23 km, kuaze oras ida resin tuir karena/motor. Aldeia ne'e la hamutuk ho aldeia sira seluk iha Suku Muapitine, maibe lokaliza iha parte leste, kuaze 5 km husi Sede Suku. 


Naran Malahara foti husi We-matan ida ne'ebe sai husi ai hun boot ida. Malah = Naran Ai husi lian Fataluku, Ara = Hun. Mayoria komunidade Malahara moris nudar 'Toos nain' 
Aldeia ida ne'e besik liu lagoa 'Ira-lalaro' (1,5 km), iha tempo udan ita bele hare inur furak iha rai pedasuk ne'e. Lagoa Ira-lalaro sae hanesan tasi kiik, no foho Paichau nebe matak. ho iklima fresko no malirin iha tempo kalan, halo rai bokur no buras.
Area Aldeia Malahara tama iha zona "Parque Nacional Nino Konis Santana".


Aldeia kiik ho numeru familia 100 resin ne'e iha potensia lubuk ida iha area; agrikultura, floresta, pekuaria, peska, no fatin interesante ba turismo ne'ebe seidauk utiliza ka dezenvolve ho diak. 


Aktividade komunidade Malahara ne'ebe halao husi ema barak (rame-rame) bainhira hakarak pasa tempu maka hanesan:
- Kasa Animal fuik iha Ai'laran.
- Kail Ikan iha Lagoa.
- Raut Ikan iha tempu bailoron.
- Buka lenuk.
- Kasa Manu fuik.
- Foti 'Meci' iha parte tasi mane (Wayara) kada tinan 1.